اسلام آباد ۔حکومت نے وفاقی وزراء اور وزرائے مملکت کی تنخواہیں ارکانِ قومی اسمبلی کے مساوی کر دی ہیں۔
تفصیلات کے مطابق صدرِ مملکت آصف علی زرداری نے “تنخواہ و مراعات ترمیمی آرڈیننس 2025” جاری کر دیا ہے، جس کے تحت تنخواہوں میں یہ اضافہ یکم جنوری 2025 سے نافذ العمل ہوگا۔
اس آرڈیننس کے تحت وفاقی وزراء اور وزرائے مملکت کی ماہانہ تنخواہیں اب ارکانِ قومی اسمبلی کے برابر ہوں گی۔ تنخواہوں میں اس ترمیم کا اطلاق رواں سال کے آغاز سے مؤثر ہو چکا ہے۔
ترمیم کے بعد وفاقی وزراء کی تنخواہ 2 لاکھ روپے سے بڑھا کر 5 لاکھ 19 ہزار روپے جبکہ وزرائے مملکت کی تنخواہ 1 لاکھ 80 ہزار روپے سے بڑھا کر 5 لاکھ 19 ہزار روپے مقرر کی گئی ہے۔
یاد رہے کہ وفاقی کابینہ نے مارچ 2025 میں اس تنخواہ اضافے کی منظوری دی تھی، اور اب صدر کی منظوری کے بعد اس فیصلے پر باضابطہ عملدرآمد شروع ہو گیا ہے۔
اس آرڈیننس کے نتیجے میں وزراء اور وزرائے مملکت کی تنخواہوں میں تقریباً 188 فیصد کا نمایاں اضافہ ہوا ہے۔
