اسلام آباد: وزیراعظم شہباز شریف نے کہا ہے کہ زراعت، آئی ٹی، معدنیات، سیاحت اور قابلِ تجدید توانائی وہ کلیدی شعبے ہیں جن میں بیرونی سرمایہ کاری کے وسیع امکانات موجود ہیں
لندن سے زوم کے ذریعے پاکستان میں سرمایہ کاری کے حجم بڑھانے اور اقتصادی و تجارتی سرگرمیوں کو فروغ دینے کے حوالے سے منعقدہ اعلیٰ سطحی اجلاس کی صدارت کرتے ہوئے وزیراعظم نے ہدایت دی کہ تمام متعلقہ وزارتیں قابلِ عمل منصوبوں کی نشاندہی کریں اور انہیں فوری طور پر عملی شکل دینے کے لیے اقدامات کریں تاکہ برآمدات میں نمایاں اضافہ کیا جا سکے
انہوں نے کہا کہ سرمایہ کاری کے ساتھ ساتھ تجارت کو فروغ دینا بھی حکومت کی پالیسی کا حصہ ہے اور اس مقصد کے لیے مستقبل کو مدنظر رکھتے ہوئے ایک جامع روڈ میپ اور اصلاحاتی ایجنڈا تشکیل دینا ضروری ہے وزیراعظم نے زور دیا کہ زیر تکمیل منصوبوں کو بروقت مکمل کرنے کے لیے تمام وسائل بروئے کار لائے جائیں
اجلاس سے خطاب میں وزیراعظم نے واضح کیا کہ اقتصادی سرگرمیوں کے روڈ میپ میں نجی شعبے کا کلیدی کردار ہوگا اور ان کی شمولیت کو ہر حال میں یقینی بنایا جائے گا انہوں نے کہا کہ موجودہ معاشی و اقتصادی اصلاحات نے معیشت کو نئی سمت دی ہے اور شفافیت کے باعث ملک ترقی کی راہ پر گامزن ہے
لندن سے ہونے والے اس اجلاس میں وفاقی وزیر ماحولیات مصدق ملک، وزیر پیٹرولیم علی پرویز ملک، وزیر خزانہ محمد اورنگزیب، وزیر تجارت جام کمال، وزیر اطلاعات عطا اللہ تارڑ اور وزیر اقتصادی امور احد خان چیمہ شریک تھے
