ٹوکیو: جاپانی سائنس دانوں کی ایک نئی تحقیق کے مطابق، ورچوئل رئیلٹی (VR) ویڈیو گیمز نہ صرف محفوظ ہو سکتی ہیں بلکہ بینائی کو بہتر بنانے میں بھی مددگار ثابت ہو سکتی ہیں۔
عمومی طور پر زیادہ وقت تک ویڈیو گیمز کھیلنے کو آنکھوں کی صحت کے لیے نقصان دہ سمجھا جاتا ہے، تاہم اس تحقیق میں انکشاف ہوا ہے کہ کچھ مخصوص وی آر گیمز دور کی نظر (far-sightedness) کے علاج میں مثبت کردار ادا کر سکتی ہیں۔
تحقیقی ٹیم نے ایک محدود مطالعے میں 10 افراد کو شامل کیا، جنہیں چھ ہفتوں تک ایک نہایت سادہ وی آر گیم کھیلنے کے لیے کہا گیا۔ اس گیم کا مقصد کھلاڑیوں کی آنکھوں کو بار بار قریب اور دور کے اہداف پر توجہ مرکوز کرنے کی مشق دینا تھا۔
گیم میں کھلاڑیوں کو VR کنٹرولرز کے ذریعے قریبی اور دُور کے اہداف پر نشانہ لگانا ہوتا تھا، اور ہر کامیاب نشانے کے بعد ہدف مزید پیچھے چلا جاتا۔ اس طرح آنکھوں کو بار بار فوکس تبدیل کرنا پڑتا، جو کہ ایک قسم کی بصری ورزش بن جاتی ہے۔
محققین کے مطابق، یہاں تک کہ وہ شرکاء جنہوں نے ہر تین دن بعد بھی یہ گیم کھیلا، ان کی بینائی میں نمایاں بہتری دیکھی گئی۔
اس مطالعے سے یہ امکان سامنے آیا ہے کہ وی آر ٹیکنالوجی کو صرف تفریح کے بجائے طبی مقاصد، خصوصاً بینائی کی بہتری کے لیے بھی استعمال کیا جا سکتا ہے۔ اگرچہ یہ تحقیق محدود پیمانے پر کی گئی ہے، تاہم یہ بینائی کے علاج کے حوالے سے ویڈیو گیمز کے ممکنہ فائدے کی جانب ایک اہم اشارہ ضرور ہے۔
