پشاور۔روایتی شندور پولو فیسٹیول کا شاندار میلہ اس سال 20 سے 22 جون تک منعقد ہوگا، جس کے لیے دنیا کے بلند ترین پولو گراؤنڈ — شندور (12 ہزار فٹ سے زائد بلندی پر) — میں تمام تر انتظامات مکمل کر لیے گئے ہیں۔
یہ رنگا رنگ ایونٹ خیبر پختونخوا حکومت، گلگت بلتستان حکومت اور فرنٹیئر کور خیبر پختونخوا نارتھ کے اشتراک سے منعقد کیا جا رہا ہے، جو سیاحت، ثقافت اور کھیلوں کے حسین امتزاج کی علامت بن چکا ہے۔
فیسٹیول کے دوران روایتی پولو میچز کا انعقاد ہوگا، جبکہ پیرا گلائیڈرز اور پیرا ٹروپرز بھی فضائی مظاہروں کے ذریعے شائقین کو محظوظ کریں گے۔
ہمیشہ کی طرح اس بار بھی ملک بھر سے سیاح اور غیر ملکی مہمان اس دلکش میلے میں شرکت کے لیے شندور کا رخ کر رہے ہیں، جو قدرتی مناظر، ثقافتی رنگوں اور ایڈونچر سے بھرپور تجربہ فراہم کرتا ہے۔
