اسلام آباد ۔وزیراعظم شہباز شریف نے پاکستان کی اقتصادی استحکام میں تعاون پر دوست ملک چین کا شکریہ ادا کرتے ہوئے دل کی گہرائیوں سے اس کی تعریف کی۔
چین کے سفیر محترم جیانگ زیڈونگ نے وزیراعظم سے ملاقات کی۔ اس موقع پر وزیراعظم نے چینی صدر شی جن پنگ اور وزیراعظم لی کیانگ کے لیے نیک خواہشات کا اظہار کیا۔
وزیراعظم نے آئندہ شنگھائی تعاون تنظیم (SCO) کے سربراہی اجلاس کی کامیابی کے لیے خیرسگالی جذبات کا اظہار کیا، اور اس اجلاس میں شرکت کے لیے اپنے ممکنہ دورہ چین کے حوالے سے جاری مشاورت کا بھی ذکر کیا۔
انہوں نے پاکستان اور چین کے مابین پائیدار، گہرے اور ہمہ موسمی “آل ویدر اسٹریٹجک کوآپریٹو پارٹنرشپ” کو اجاگر کرتے ہوئے اس بات پر زور دیا کہ پاکستان چین کے ساتھ مل کر سی پیک کے جاری منصوبوں کو کامیابی سے مکمل کرنے کے لیے پرعزم ہے۔
اس ضمن میں وزیراعظم نے مختلف اہم منصوبوں جیسے ML-I ریلوے لائن، قراقرم ہائی وے (KKH)، گوادر بندرگاہ کی فعالی کے ساتھ ساتھ زراعت، صنعتی شعبے اور آئی ٹی کے میدان میں تعاون پر روشنی ڈالی۔
انہوں نے ایک مرتبہ پھر چین کی جانب سے مالی و اقتصادی معاونت پر تہہ دل سے شکریہ ادا کیا، جس نے پاکستان کی معیشت کو سنبھالنے میں کلیدی کردار ادا کیا اور ملک کے مجموعی معاشی منظرنامے (macro-economic outlook) میں مثبت بہتری لانے میں مدد دی۔
وزیراعظم نے اس بات پر بھی زور دیا کہ چین کا تعاون حکومت کے سماجی و اقتصادی ترقی کے ایجنڈے کو عملی جامہ پہنانے کے لیے نہایت اہم ہے۔
ملاقات کے دوران خطے کی سیکیورٹی صورتحال، بالخصوص ایران اور اسرائیل کے درمیان حالیہ کشیدگی پر بھی گفتگو ہوئی۔
چینی سفیر نے عالمی سطح پر، خصوصاً اقوام متحدہ کی سلامتی کونسل میں پاکستان کی سفارتی کوششوں اور بحران کے پرامن حل کے لیے کردار کو سراہا۔
سفیر جیانگ زیڈونگ نے وزیراعظم کو پاک چین تعاون کے مختلف پہلوؤں سے آگاہ کیا اور بتایا کہ وزیراعظم کے آئندہ متوقع دورہ چین، جو اگست 2025 کے اختتام پر متوقع ہے، کو کامیاب بنانے کے لیے تیاریاں شروع کر دی گئی ہیں۔
