اسلام آباد ۔چیئرمین پیپلز پارٹی بلاول بھٹو زرداری نے کہا ہے کہ سرنڈر کرنا پاکستان کی ڈکشنری میں نہیں، پاکستان دہشتگردی کے خلاف دو دہائیوں سے جنگ لڑ رہا ہے اور اس میں ناقابلِ فراموش قربانیاں دی گئی ہیں۔
اسلام آباد میں پالیسی ریسرچ انسٹیٹیوٹ کی تقریب سے خطاب کرتے ہوئے بلاول بھٹو نے کہا کہ دہشتگردی ایک عالمی مسئلہ ہے، اور پاکستان نے اس جنگ میں 92 ہزار سے زائد جانوں کا نذرانہ دیا، جن میں شہریوں سمیت سیکیورٹی فورسز کے اہلکار بھی شامل ہیں۔
انہوں نے بتایا کہ صرف گزشتہ سال دہشتگردی کے خلاف کارروائیوں میں 600 سے زائد جوان شہید ہوئے، جو اس عزم کی دلیل ہے کہ پاکستان دہشتگردی کے مکمل خاتمے تک چین سے نہیں بیٹھے گا۔
بھارت کو مخاطب کرتے ہوئے بلاول بھٹو نے کہا کہ وہ الزام تراشی کی بجائے دہشتگردی کے خاتمے کے لیے عالمی کوششوں کا حصہ بنے۔ انہوں نے زور دیا کہ خطے میں پائیدار امن کے لیے بھارت کو مذاکرات کی میز پر آنا ہوگا اور کشمیر جیسے تصفیہ طلب مسائل پر سنجیدہ بات چیت کرنا ہوگی۔
