اپوزیشن لیڈر قومی اسمبلی عمر ایوب نے سپیکر سردار ایاز صادق کی دعوت کا جواب دے دیا۔ تحریک انصاف نے مذاکرات کی پیشکش مسترد کر دی۔
پاکستان تحریک انصاف (پی ٹی آئی)نے سپیکر قومی اسمبلی کی مذاکرات کی پیشکش مسترد کر دی، اس سلسلے میں اپوزیشن لیڈر قومی اسمبلی عمر ایوب نے سپیکر سردار ایاز صادق کی دعوت کا جواب دے دیا۔
پی ٹی آئی کے رہنما عمر ایوب نے کہا کہ مذاکرات کا باب بند ہو گیا ہے، اب ہم مذاکرات نہیں کریں گے، اس حوالے سے حکومت کے ارادے ٹھیک ہیں اور نہ ہی نیت۔
ان کا مزید کہنا تھا کہ سیاسی مذاکرات خواہشات پر نہیں، مستحکم ارادوں سے ہوتے ہیں۔ اس حوالے سے ہمیں حکومت کی طرف سے کوئی واضح اشارے نہیں ملے۔
واضح رہے کہ گزشتہ روز حکومت نے ایک بار پھر پی ٹی آئی کو مذاکرات کی آفر کی تھی، اس حوالے سے سپیکر قومی اسمبلی سردار ایاز صادق کا کہنا تھا کہ ہم نے کبھی بھی مذاکرات کے لئے دروازے بند نہیں کئے، اسی لئے مذاکراتی کمیٹی بھی تحلیل نہیں ہوئی۔
سپیکر ایاز صادق کا مزید کہنا تھا کہ جیل کے اندر سے پہلے منظوری آ جائے پھر ہمارے پاس بھی آ جائیں گے، بانی پی ٹی آئی عمران خان سخت آدمی ہیں۔
