اسلام آباد ۔پاکستان نیول اکیڈمی پی این ایس رہبر میں چیف آف آرمی اسٹاف فیلڈ مارشل سید عاصم منیر کو پاک بحریہ کے مستعد دستے نے پرجوش سلامی پیش کی، جس کے بعد فیلڈ مارشل عاصم منیر نے پریڈ کا تفصیلی معائنہ کیا۔
فیلڈ مارشل عاصم منیر نے 123ویں مڈ شپ مین کورس اور 31ویں شارٹ سروس کمیشن کورس میں شاندار کارکردگی دکھانے والے کیڈٹس میں انعامات تقسیم کیے۔ اس موقع پر پاک بحریہ کے سینئر افسران موجود تھے جبکہ فارغ التحصیل کیڈٹس کے والدین اور اہل خانہ بھی اس تقریب میں شریک ہوئے۔
پاک فوج کے سپہ سالار فیلڈ مارشل سید عاصم منیر مہمان خصوصی کی حیثیت سے کراچی میں واقع پاکستان نیول اکیڈمی پی این ایس رہبر میں پاک بحریہ کے کیڈٹس کی پاسنگ آؤٹ پریڈ میں شریک ہوئے۔ اس تقریب میں اہم ملکی شخصیات کے ساتھ ساتھ غیر ملکی سفارتی نمائندے بھی شریک تھے۔
پاسنگ آؤٹ پریڈ کے دوران کامیاب کیڈٹس سے ان کے آئندہ فرائض کی انجام دہی کا حلف لیا گیا۔ اس موقع پر مہمان خصوصی فیلڈ مارشل عاصم منیر نے اعلیٰ کارکردگی دکھانے والے کیڈٹس کو اعزازات سے نوازا۔
اختتام پر فیلڈ مارشل سید عاصم منیر نے نمایاں کارکردگی پر کیڈٹ عبدالرحمٰن کو اعزازی شمشیر عطا کی۔
