کراچی ۔پاکستان اسٹاک ایکسچینج (PSX) نے آج ایک اور نئی مثال قائم کرتے ہوئے تاریخی سنگِ میل عبور کیا، اور کے ایس ای 100 انڈیکس 1,31,000 پوائنٹس کی بلند ترین سطح سے بھی آگے نکل گیا۔
نئے مالی سال کے آغاز کے ساتھ ہی حصص بازار نے زبردست پیش رفت دکھائی ہے، جس کے نتیجے میں سرمایہ کاروں کے اعتماد میں نمایاں اضافہ دیکھنے میں آ رہا ہے۔
جمعرات کے روز مارکیٹ کا آغاز پرجوش ماحول میں ہوا، اور کاروبار کے آغاز پر ہی 100 انڈیکس میں 727 پوائنٹس کی بھرپور تیزی ریکارڈ کی گئی، جس سے انڈیکس 131,071 پوائنٹس کی نئی ریکارڈ سطح پر پہنچ گیا۔
یہ مثبت رجحان اُس تسلسل کا حصہ ہے جو مالی سال 2025-26 کے ابتدائی دن سے ہی جاری ہے۔
گزشتہ چند دنوں سے اسٹاک مارکیٹ میں زبردست تیزی کا رجحان برقرار ہے۔ بدھ کے روز بھی کے ایس ای 100 انڈیکس نے 130,000 کی نفسیاتی حد عبور کی تھی، اور محض پانچ تجارتی دنوں کے دوران انڈیکس میں مجموعی طور پر 9,000 پوائنٹس سے زائد کا اضافہ دیکھنے کو ملا، جو حالیہ برسوں کی بہترین کارکردگیوں میں شمار کیا جا رہا ہے۔
معاشی تجزیہ کاروں کے مطابق مالی سال کے آغاز کے ساتھ ہی سرمایہ کاروں کی دلچسپی میں زبردست اضافہ ہوا ہے، جس کی وجوہات میں حکومت کی اقتصادی حکمتِ عملی، آئی ایم ایف کے ساتھ بہتر ہوتے تعلقات، اور صنعتی شعبے میں ترقی کی امیدیں شامل ہیں۔
اس شاندار کارکردگی نے نہ صرف مارکیٹ کے تجارتی حجم میں نمایاں اضافہ کیا ہے بلکہ معیشت کے لیے بھی مثبت پیغامات دیے ہیں۔ ماہرین کا کہنا ہے کہ اگر موجودہ رفتار جاری رہی تو سرمایہ کاروں کو قلیل اور طویل مدت میں بہتر منافع کی توقع ہو سکتی ہے۔
پاکستان اسٹاک ایکسچینج کی یہ غیر معمولی پیش رفت بین الاقوامی سرمایہ کاری حلقوں کی توجہ بھی حاصل کر رہی ہے، اور اسے ملکی معیشت میں بہتری اور استحکام کی علامت کے طور پر دیکھا جا رہا ہے۔
