پاکستانی اداکارہ ماورا حسین نے مشہور اداکار امیر گیلانی کیساتھ شادی کی ہے، تصاویر سوشل میڈیا پر شیئر ہوئیں تو مداحوں میں خوشی کی لہر دوڑ گئی۔
ان دونوں کی جوڑی کو ڈرامہ “سبات” اور “نیم” میں بے حد پسند کیا گیا تھا اور ان کی کیمسٹری نے شائقین کو یہ سوچنے پر مجبور کر دیا تھا کہ شاید یہ جوڑی حقیقی زندگی میں بھی ایک ہو جائے۔
شادی سے قبل دونوں اداکاروں نے کبھی بھی اپنے تعلقات کے بارے میں کھل کر بات نہیں کی۔ مگر شادی کی تصاویر اور ویڈیوز نے تمام افواہوں کو حقیقت میں بدل دیا۔
شادی کی تقریبات لاہور اور اسلام آباد میں منعقد کی گئیں، جہاں قریبی دوستوں اور خاندان والوں نے شرکت کی۔ اس کے بعد جاری کی گئی ویڈیو میں شادی کے حسین لمحات کی جھلکیاں دکھائی گئیں۔
شادی کے بعد امیر گیلانی نے انسٹاگرام پر خوشی کا اظہار کرتے ہوئے لکھا: “الحمدللہ، میں نے اپنی بہترین دوست سے شادی کر لی اور اس خوشی کو اپنی دنیا کے ساتھ منایا۔ آپ سب کی دعاں اور محبتوں کا شکریہ!”
امیر گیلانی ایک تعلیم یافتہ اور معزز پاکستانی خاندان سے تعلق رکھتے ہیں۔ ان کے دادا سید افتخار حسین گیلانی معروف وکیل اور سیاستدان تھے، جو سابق وزیر اعظم بے نظیر بھٹو کے دور میں 1988 سے 1990 تک وفاقی وزیر قانون رہے۔
امیر نے 2022 میں ہارورڈ لا اسکول سے قانون کی ڈگری حاصل کی، لیکن اداکاری کا شوق انہیں ٹی وی انڈسٹری میں لے آیا۔ انہیں ڈرامہ سیریل “سبات” میں ‘حسن’ کے کردار سے شہرت ملی۔
ماورا حسین کی بہن معروف اداکارہ اروہ حسین 18 دسمبر 2016 کو گلوکار و اداکار فرحان سعید کے ساتھ رشتہ ازدواج میں منسلک ہوئی تھیں۔
اداکار جوڑے کی شادی پر شوبز انڈسٹری کی شخصیات اور مداحوں کی جانب سے مبارکبادوں کا سلسلہ جاری ہے، جو ان کے لیے نیک تمنائوں کا اظہار کر رہے ہیں۔
