فلم میں وکی کوشل اور رشمیکا مندانا کے ساتھ اکشے کھنہ مرکزی کردار ادا کر رہے ہیں جبکہ ہدایتکاری معروف فلمساز لکشمن اتیکر نے کی ہے ۔
بالی وڈ کے مشہور اداکار وکی کوشل اور سائوتھ انڈین فلم انڈسٹری کی سپر اسٹار رشمیکا مندانا کی تاریخ اور سنسنی سے بھرپور فلم چھاوا کا ٹریلر ریلیز کر دیا گیا، فلم میں رشمیکا مندانا نے سبھاجی مہاراج کی اہلیہ کا کردار نبھایا ہے۔
کوشل اور رشمیکا مندانا کی فلم میڈاک فلمز کے بینر تلے بنائی گئی ہے۔ چھاوا کے ٹریلر میں چھترپتی سبھاجی مہاراج کی زندگی کی جھلکیاں دکھائی گئی ہیں۔
یہ چھترپتی شیواجی مہاراج کی موت کے بعد شاہی تخت سنبھالنے کے سفر پر مبنی ہیں۔ ٹریلر میں وکی کوشل، سبھاجی مہاراج کے کردار میں بے مثال نظر آتے ہیں اور یہ فلم ان کے کیریئر کی بہترین فلم قرار دی جا رہی ہے۔
اس فلم میں رشمیکا مندانا نے سبھاجی مہاراج کی اہلیہ کا کردار نبھایا ہے جبکہ اکشے کھنہ مغل بادشاہ اورنگزیب کے روپ میں ولن کے کردار میں نظر آ رہے ہیں۔
فلم کے ٹریلر کے بیک گرائونڈ میوزک کو اے آر رحمان نے کمپوز کیا ہے، یہ فلم 14 فروری 2025 کو سینما گھروں کی زینت بننے جا رہی ہے۔
