لاہور۔ابھرتی ہوئی اداکارہ مریم نفیس کے یہاں ایک خوبصورت بیٹے کی پیدائش ہوئی ہے، جس کا نام عیسیٰ رکھا گیا ہے۔
مریم نفیس نے اپنے انسٹاگرام اکاؤنٹ پر یہ خوشخبری اپنے مداحوں کے ساتھ شیئر کرتے ہوئے لکھا کہ “ہماری دنیا اب اور بھی حسین ہوگئی۔”
اداکارہ نے مزید لکھا کہ “ملیں سید عیسیٰ امان احمد سے۔ ایک ہفتے سے بھی کم عمر اس پیارے بچے نے اس بابرکت ماہ میں آ کر ہمیں اپنی محبت میں گرفتار کر لیا۔”
انہوں نے اپنے بیٹے کو دنیا میں خوش آمدید کہتے ہوئے دعا کی کہ اللہ آپ کے سارے خوابوں کو پورا کرے، آمین۔ ساتھ ہی انہوں نے مداحوں سے درخواست کی کہ ہمیں اپنی دعاؤں میں یاد رکھیں۔
مریم نفیس نے اولاد کی خواہش مند خواتین کے لیے دعا کرتے ہوئے کہا کہ “اللہ آپ کو جلد ہی ایک صحت مند بچہ عطا فرمائے، آمین۔”
اداکارہ نے اپنے نومولود بیٹے کی تصاویر بھی شیئر کیں، جن میں ان کے شوہر امان احمد بھی شامل ہیں اور دونوں نے بچے کو گود میں اٹھا رکھا ہے۔
یاد رہے کہ 30 سالہ مریم نفیس نے اکتوبر 2022 میں ہدایت کار امان احمد سے شادی کی تھی، جو مریم سے 13 سال بڑے ہیں اور ان کی پہلی شادی بشریٰ انصادی کی بیٹی کے ساتھ ہوئی تھی۔
