اسلام آباد:سائنس دانوں نے ایک دوا کے حوالے سے ابتدائی طور پر امید افزا نتائج حاصل کیے ہیں جو عمر بڑھنے کے ساتھ جسم میں جمع ہونے والے نقصان زدہ خلیوں کو ختم کرکے زخم بھرنے کے عمل کو بہتر بنانے میں مدد دے سکتی ہے۔
تحقیق میں ABT-263 نامی دوا کے اثرات کا جائزہ لیا گیا اور عمر رسیدہ چوہوں کی جلد پر اسے براہ راست استعمال کیا گیا۔ محققین کے مطابق دوا کے استعمال سے جلد میں عمر رسیدگی سے منسلک نقصان زدہ خلیوں کی تعداد کم ہوئی اور زخم بھرنے کے عمل میں بہتری دیکھی گئی۔
محققین کے مطابق عمر بڑھنے کے ساتھ جسم میں سینسنٹ سیلز جمع ہونے لگتے ہیں جو عام طور پر تقسیم نہیں ہوتے اور اردگرد کے ٹشوز کے معمول کے افعال میں رکاوٹ بن سکتے ہیں۔
ماہرین کا کہنا ہے کہ یہ نتائج مستقبل میں عمر رسیدہ افراد کے دیر سے بھرنے والے زخموں کے علاج کے لیے نئی راہ ہموار کرسکتے ہیں تاہم ابھی یہ تجربات صرف چوہوں پر کیے گئے ہیں۔ انسانوں میں دوا کی حفاظت اور مؤثریت جانچنے کے لیے مزید تحقیق اور کلینیکل مطالعات کی ضرورت ہے۔
