لاہور۔پاکستان کرکٹ ٹیم کے عبوری ہیڈ کوچ عاقب جاوید نے بابراعظم اور محمد رضوان کو ٹی ٹوئنٹی کرکٹ میں واپسی کا راستہ بتا دیا ہے۔
لاہور میں پریس کانفرنس کرتے ہوئے عاقب جاوید نے کہا کہ بابراعظم اور محمد رضوان کو ٹی ٹوئنٹی سے مستقل طور پر ڈراپ نہیں کیا گیا، تاہم ان کی واپسی کے لیے ڈومیسٹک کرکٹ میں بہترین کارکردگی دکھانا ضروری ہوگا۔
انہوں نے مزید کہا کہ بابر اعظم، محمد رضوان اور شاہین شاہ آفریدی کو اپنی فارم کو بحال کرنے کے لیے فرسٹ کلاس اور لسٹ اے کرکٹ کھیلنی ہوگی۔ ان کا کہنا تھا کہ اگر کھلاڑی پورے سال میں 70 فیصد ٹی ٹوئنٹی کرکٹ کھیلیں گے تو وہ ٹیسٹ اور ون ڈے کرکٹ میں اچھی کارکردگی نہیں دکھا سکیں گے، اور کھلاڑیوں کو اپنی ذمہ داری کا شعور ہونا ضروری ہے۔
عاقب جاوید نے پاکستان کرکٹ کی حالیہ ناقص کارکردگی کی وجہ گزشتہ دو سالوں کے دوران بدلتے ہوئے کوچز اور سلیکٹرز کو قرار دیتے ہوئے کہا کہ جب تک کرکٹ کے نظام میں تسلسل نہیں آئے گا، نتائج میں بہتری نہیں آ سکتی۔
یاد رہے کہ گزشتہ روز پاکستان کرکٹ بورڈ نے نیوزی لینڈ کے دورے کے لیے قومی اسکواڈ کا اعلان کیا، جس میں بابراعظم اور محمد رضوان کو ٹی ٹوئنٹی سے ڈراپ کر دیا گیا، جبکہ شاہین شاہ آفریدی اور حارث رؤف کو ون ڈے سے باہر کیا گیا تھا۔
پاکستان کرکٹ ٹیم کی حالیہ کارکردگی مایوس کن رہی، خصوصاً گزشتہ سال ٹی ٹوئنٹی ورلڈ کپ میں گروپ مرحلے میں امریکا جیسی ناتجربہ کار ٹیم کے ہاتھوں شکست کے بعد ٹیم میں تبدیلیاں کی گئی ہیں، اور سینیئر کھلاڑیوں کو باہر کر کے نوجوانوں کو موقع دیا گیا ہے۔
سلمان علی آغا جنوری 2024 کے بعد پاکستان کے چوتھے ٹی ٹوئنٹی کپتان بنے ہیں، اور انہوں نے محمد رضوان کی جگہ کپتانی سنبھالی، جبکہ اس سے قبل بابر اعظم اور شاہین آفریدی بھی ٹیم کی قیادت کر چکے ہیں۔
