لاہور: لاہور ہائی کورٹ نے پاکستان تحریک انصاف کے بانی عمران خان کی 9 مئی سے متعلق 8 مقدمات میں ضمانت کی درخواستیں مسترد کر دیں۔
لاہور ہائی کورٹ کے جسٹس شہباز رضوی کی قیادت میں دو رکنی بینچ نے درخواستوں کی سماعت مکمل کرنے کے بعد محفوظ فیصلہ سنایا، جس میں عمران خان کی 9 مئی کے 8 مقدمات میں ضمانت کی درخواستیں خارج کر دی گئیں۔
یہ بات قابل ذکر ہے کہ گزشتہ روز لاہور ہائی کورٹ میں عمران خان کی جانب سے 9 مئی کے 8 مختلف مقدمات میں ضمانت کی درخواستوں کی سماعت کی گئی تھی۔
لاہور ہائی کورٹ کے جسٹس شہباز رضوی کی سربراہی میں بنچ نے عمران خان کی ضمانت کی درخواستوں پر دلائل سننے کے بعد کیس کا فیصلہ محفوظ کر لیا تھا۔
یاد رہے کہ 9 مئی 2023 کو مختلف شہروں میں احتجاج اور جلاؤ گھیراؤ کے واقعات کے بعد عمران خان کے خلاف متعدد مقدمات درج کیے گئے، جن میں سرکاری املاک کو نقصان پہنچانے، اشتعال انگیزی اور امن و امان خراب کرنے کے الزامات شامل ہیں۔
