سکیورٹی اہلکاروں نے خوارج کی بنوں چیک پوسٹ میں داخل ہونے کی کوشش ناکام بنائی، جس پر خوارج نے بارود سے بھری گاڑی پوسٹ کی دیوار سے ٹکرا دی۔
پاک فوج کے شعبہ تعلقات عامہ آئی ایس پی آر کے مطابق بنوں کے علاقے میں سکیورٹی فورسز کی مشترکہ چیک پوسٹ پر خوارج کی جانب سے حملے کی کوشش کی گئی۔ اس دوران دہشتگردوں کے ساتھ فائرنگ کے تبادلے میں 6 خوارج ہلاک کر دیئے گئے جبکہ خوارج کے خود کش حملے میں 12 سکیورٹی اہلکار شہید ہو گئے۔
پاک فوج کے شعبہ تعلقات عامہ کے مطابق بنوں چیک پوسٹ پر حملے کے دوران شہید ہونے والوں میں سکیورٹی فورسز کے 10 اہلکار اور 2 فرنٹیئر کانسٹیبلری کے اہلکار شامل ہیں۔
آئی ایس پی آر کے مطابق سکیورٹی فورسز کے اہلکاروں نے خوارج کی جانب سے ضلع بنوں کے علاقے ملی خیل میں ایک مشترکہ چیک پوسٹ میں داخل ہونے کی کوشش ناکام بنا دی، چیک پوسٹ میں داخل ہونے کی کوشش ناکام ہونے پر خوارج نے بارود سے بھری گاڑی چیک پوسٹ کی دیوار کے ساتھ ٹکرا دی۔
پاک فوج کے شعبہ تعلقات عامہ کے مطابق خوارج کے اس خودکش دھماکے سے چیک پوسٹ کی دیوار کا ایک حصہ گر گیا، خودکش دھماکے سے ملحقہ انفرا اسٹرکچر کو نقصان پہنچا جس سے 12شہادتیں ہوئیں۔
ترجمان پاک فوج کے مطابق علاقے میں کلیئرنس آپریشن جاری ہے اور اس گھنائونے عمل کے ذمے داروں کو انصاف کے کٹہرے میں لایا جائے گا۔ پاکستان کی سکیورٹی فورسز اور قانون نافذ کرنے والے ادارے دہشت گردی کے خاتمے کے لیے پرعزم ہیں۔ ہمارے بہادر جوانوں کی یہ قربانیاں ہمارے عزم کو مزید مضبوط کرتی ہیں۔
