پاکستان کی طرف سے آئی سی سی چیمپیئنز ٹرافی کھیلنے کے سلسلے میں 20 سے زائد کھلاڑیوں پر مشتمل ابتدائی سکواڈ کا اعلان کرتے ہوئے جمع کروا دیا گیا۔
ذرائع کے مطابق سلیکشن کمیٹی نے آئی سی سی چیمپیئنز ٹرافی کے سلسلے میں ابتدائی سکواڈ آئی سی سی کو دو روز قبل جمع کروایا، پاکستان کی طرف سے اوپنر صائم ایوب کا نام بھی ابتدائی سکواڈ میں بھیجا گیا ہے۔
پاکستان کرکٹ بورڈ کی سلیکشن کمیٹی کی طرف سے جمع کروائے گئے ابتدائی سکواڈ میں کپتان محمد رضوان، بابر اعظم، طیب طاہر، عرفان خان نیازی، سفیان مقیم، محمد حسنین، عبداللہ شفیق کے نام شامل ہیں۔
ان کے ساتھ ساتھ نسیم شاہ، عثمان خان، شاہین شاہ آفریدی، حارث روف، ابرار احمد، کامران غلام اور سلمان علی آغا، امام الحق، فخر زمان، حسیب اللہ اور عباس آفریدی کے نام بھی شامل کئے گئے ہیں۔
پاکستان کرکٹ بورڈ کی سلیکشن کمیٹی کی طرف سے چیمپیئنز ٹرافی کے لیے حتمی سکواڈ کا اعلان 10 فروری کو متوقع ہے۔
چیمپیئنز ٹرافی کھیلنے کے سلسلے میں حتمی سکواڈ میں متعدد تبدیلیاں ہوں گی جس میں اوپنر عبداللہ شفیق اور عثمان خان کی شمولیت کے امکانات بہت کم ہیں۔
آئی سی سی میں ابتدائی سکواڈ جمع کروانے کے بعد حتمی ٹیم کا اعلان بعد میں کیا جائے گا، اس حوالے سے اوپنر صائم ایوب کی شرکت بھی ان کی فٹنس سے مشروط ہو گی.
