بانی پی ٹی آئی نے کہا ہے کہ آج اگر حکومت نے جوڈیشل کمیشن بنانے کا اعلان نہ کیا تو ہمارے مذاکرات ختم ہیں، بیرسٹر گوہر
پاکستان تحریک انصاف کے بانی اور سابق وزیراعظم عمران خان نے حکومت کے ساتھ جاری مذاکرات ختم کرنے کا اعلان کر دیا۔ یہ بات پاکستان تحریک انصاف کے چیئرمین بیرسٹر گوہر نے اڈیالہ جیل کے باہر میڈیا سے گفتگو کرتے ہوئے بتائی۔
انہوں نے کہا کہ بانی پی ٹی آئی عمران خان سے میری اور دیگر وکلا کی ملاقات ہوئی ہے، عمران خان نے پہلے بھی حکومت کو سات دن کا وقت دیا تھا، بانی پی ٹی آئی نے کہا ہے کہ آج اگر حکومت نے کمیشن کا اعلان نہ کیا تو مزید بات چیت جاری نہیں رکھیں گے۔
بیرسٹر گوہر نے کہا کہ اگر کمیشن کا اعلان اسی دوران نہیں ہوتا تو ہمارے مذاکرات کے مزید رائونڈ آگے نہیں چلیں گے، حکومت نے کمیشن کا اعلان ابھی تک نہیں کیا ، ہماری خواہش تھی یہ عمل آگے بڑھے۔
اگر حکومت کی طرف سے جوڈیشل کمیشن بننا ہے تو تین سنیئر ججز سپریم کورٹ یا ہائیکورٹ سے ہونے چاہیے، ہم آئین اور قانون کے مطابق اپنی جدوجہد کو جاری رکھیں گے۔
ان کا کہنا تھا کہ آزاد عدلیہ اور 26ویں ترمیم کے خلاف کوشش کریں گے، ساری سیاسی جماعتوں کے ساتھ مل کر جدوجہد شروع کی جائے گی۔ عمران خان نے کہا ہے آج کے دن تک کمیشن کا اعلان ہونا تھا نہیں ہوا۔
انہوں نے مزید کہا کہ عمران خان پہلے کہہ چکے ہیں کہ ہمیں کسی بیرون ملک کی مدد کا انتظار نہیں ہے نہ پی ٹی آئی اس بات پر یقین کرتی ہے۔
