اکثر لوگ کینو کھانے کے بعد اس کے چھلکوں کو بغیر سوچے سمجھے پھینک دیتے ہیں حالانکہ کینو کے چھلکے بھی بے پناہ فوائد کے حامل ہیں۔
کینو موسم سرما کا مزیدار پھل ہے جسے اس کی رسیلی مٹھاس کی وجہ سے بچے بڑے سب ہی شوق سے کھاتے ہیں۔ کینو کھانے کے بے شمار فوائد ہیں کیونکہ اس میں موجود وٹامن سی سے جسم کوتوانائی ملتی ہے۔
آپ کینو کے چھلکے کلینر سے لے کر چہرے کے اسکرب تک اپنی روز مرہ کی زندگی میں کئی طریقوں سے استعمال کر سکتے ہیں، گھر میں ان کو استعمال کرنے کے چند آسان طریقے مندرجہ ذیل ہیں۔
قدرتی ایئر فریشنر:
آپ کینو کے چھلکوں کو دار چینی اور لونگ کے ساتھ پانی میں ابالیں جس سے چند منٹوں میں آپ کا گھر خوشبو سے مہک جائے گا۔ آپ مہمانوں کے آنے سے پہلے اس ترکیب کو آزما سکتے ہیں۔
چہرے کی خوبصورتی:
کچھ چھلکے خشک کر کے باریک پیس لیں۔ اسے شہد یا دہی کے ساتھ ملاکر اپنی جلد کو صاف کریں، یہ چہرے سے جلد کے مردہ خلیوں کو ہٹاتے ہیں جس سے آپ کو تازہ چمکدار جلد ملتی ہے، ان چھلکوں سے دانتوں کو بھی چمکایا جا سکتا ہے۔
چھلکوں کا قہوہ:
سوکھے ہوئے چھلکوں کو گرم پانی میں ادرک اور شہد کے ساتھ ملاکر پئیں۔ یہ اینٹی آکسیڈنٹس اور وٹامن سی سے بھرا ہوا ہے جو سردیوں کے فلو میں مبتلا افراد کیلئے بہترین ہے۔
ماحول دوست کلینر:
ان چھلکوں سے آپ ایک ماحول دوست کلینر بھی بنا سکتے ہیں۔ آپ کو صرف یہ کرنا ہے کہ ان چھلکوں کو سرکہ میں دو ہفتوں تک بھگو دیں اور پھر اس مائع کو اسپرے کی بوتل میں چھان لیں۔ یہ کلینر چکنائی کو دور کرنے، داغوں سے نمٹنے کے لیے بہترین ہے، اس سے آپ کچن کاونٹرز، شیشوں یا اپنے باتھ روم کی صفائی کیلئے استعمال کریں۔
بہترین کھاد بنائیں:
ان چھلکوں سے آپ اپنے گارڈن کیلئے بہترین کھاد بنا سکتے ہیں۔ کھاد میں شامل کرنے سے پہلے چھلکوں کو چھوٹے چھوٹے ٹکڑوں میں کاٹ لیں۔ چھلکوں میں موجود تیزابیت نامیاتی مادے کو تیزی سے توڑتی ہے جس سے کھاد پودوں کیلئے زیادہ صحت مند ہوتی ہے۔
