مصطفی قتل کیس کی تحقیقات جاری ہیں جس میں منشیات فروشی کے الزام میں مشہور اداکار کے بیٹے کا نام بھی سامنے آ گیا۔
پوش علاقے سے گرفتار ہونے والے مشہور ٹی وی اداکار ساجد حسن کے بیٹے ساحر حسن کے خلاف اسپیشلائزڈ انویسٹی گیشن یونٹ میں مقدمہ درج کر لیا گیا ہے۔
ایس آئی یو پولیس کے مطابق اداکار ساجد حسن کے بیٹے ساحر حسن سے غیر ملکی برانڈ کی منشیات ملی ہے، ساحر حسن گزشتہ 2 سال سے منشیات فروخت کر رہا تھا۔
ملزم ساحر حسن کے قبضے سے 50 لاکھ روپے مالیت کی منشیات ملی ہے اور وہ مصطفی قتل کیس میں گرفتار ارمغان کو بھی منشیات فروخت کرتا تھا۔
ملزم ساحر حسن نے تفتیش میں اہم انکشافات کیے ہیں، ساحر حسن نے بتایا کہ وہ گزشتہ دو سال سے منشیات فروخت کر رہا ہے۔
ملزم کے مطابق وہ بازل اور یحییٰ نامی منشیات فروشوں سے ڈرگز حاصل کر کے شہر کے پوش علاقوں میں فروخت کرتا رہا ہے۔
ایس آئی یو پولیس کے مطابق ملزم ساحر حسن کو ڈیفنس فیز 6 خیابان راحت سے گرفتار کیا گیا، ملزم کے خلاف منشیات فروشی کی دفعات کے تحت مقدمہ درج کر لیا گیا۔
یاد رہے کہ ہائی پروفائل کیس کے سلسلے میں پولیس کی تفتیش تیزی کے ساتھ جاری ہے.
