اسلام آباد ۔وزیرِ اعظم پاکستان شہباز شریف نے رمضان کے مہینے میں سحر و افطار کے اوقات میں گیس کی فراہمی میں مشکلات کا نوٹس لیتے ہوئے فوری اقدامات کرنے کی ہدایت کی ہے۔
وزیرِ اعظم نے اس حوالے سے رات گئے ایک ہنگامی اجلاس منعقد کیا، جس میں سوئی کمپنیوں کے منیجنگ ڈائریکٹرز اور سینئر انتظامیہ کے ساتھ سحر و افطار کے دوران گیس کی فراہمی کے مسائل پر تفصیل سے بات چیت کی گئی۔
وزیرِ اعظم کی ہدایات پر سوئی سدرن گیس کمپنی نے گیس پریشر میں 10 فیصد اضافے کا فیصلہ کیا ہے۔
اس کے علاوہ، گیس ڈسٹریبیوشن مراکز کے آخری سروں پر واقع علاقوں میں سحری اور افطار کے اوقات سے 30-45 منٹ پہلے گیس کی فراہمی شروع کی جائے گی، تاکہ ان علاقوں میں گیس کے پریشر میں بہتری لائی جا سکے۔
سوئی سدرن گیس کمپنی نے گیس کی ترسیل کے نظام کی نگرانی کے لیے ہیڈ آفس اور ریجنل دفاتر میں کنٹرول رومز بنانے کا بھی اعلان کیا ہے، جو روزانہ کی بنیاد پر گیس کی فراہمی کی صورتحال کا جائزہ لیں گے۔
کمپنی کے ترجمان نے کہا کہ گیس کے کم پریشر کی شکایات کو ہنگامی بنیادوں پر حل کیا جائے گا، اور اس سلسلے میں روزانہ کی بنیاد پر رپورٹ پیش کی جائے گی۔
دوسری جانب سوئی ناردرن گیس کے ترجمان نے اپنے جاری بیان میں کہا ہے کہ وزیرِ اعظم کی ہدایات پر فوری طور پر سحر و افطار کے اوقات میں گیس کی فراہمی ہر صورت یقینی بنائی جائے گی۔ شہری کسی بھی شکایت کی صورت میں 1199 پر رابطہ کر سکتے ہیں۔
