اسلام آباد ۔آئی ایم ایف نے بین الاقوامی سرمایہ کاری منصوبوں پر ٹیکس کی چھوٹ دینے کے مطالبے کو مسترد کر دیا۔
ذرائع کے مطابق، بین الاقوامی مالیاتی فنڈ (آئی ایم ایف) نے اسپیشل انویسٹمنٹ فیسلٹی کونسل (ایس آئی ایف سی) کی جانب سے بین الاقوامی سرمایہ کاری منصوبوں پر ٹیکس کی چھوٹ دینے کے مطالبے کو مسترد کر دیا ہے۔
آئی ایم ایف کو ایس آئی ایف سی کی سرگرمیوں پر بریفنگ دی گئی۔ ایس آئی ایف سی کے اہلکاروں نے آئی ایم ایف کے وفد کو سرمایہ کاری، حکومتی امور اور ڈھانچے کے حوالے سے تفصیلات سے آگاہ کیا۔ اس دوران پاکستانی حکام نے چاغی سے گوادر تک ریلوے لائن کے منصوبے پر ٹیکس چھوٹ دینے کی درخواست کی۔
ذرائع کے مطابق، ریکوڈک سے نکالی جانے والی معدنیات کو گوادر تک پہنچانے کے لیے ریلوے ٹریک کی ضرورت ہے۔ ریکوڈک سے نکلنے والی معدنیات کو گوادر تک منتقل کرنے کے لیے ایک نئی لائن کی تعمیر کی تجویز دی گئی ہے۔
چاغی۔گوادر ریل منصوبے پر وزارتِ خزانہ، وزارتِ ریلوے اور ایس آئی ایف سی کی جانب سے فزیبیلٹی اسٹڈی کی گئی۔ بریفنگ میں بتایا گیا کہ سرمایہ کاری کرنے والے ممالک اس منصوبے میں سرمایہ کاری پر ریاستی ضمانت کی توقع رکھتے ہیں۔ ذرائع کے مطابق، قرض کے پروگرام کے تحت حکومتِ پاکستان ہر سرمایہ کاری پر ریاستی ضمانت فراہم نہیں کر سکتی۔
