لندن۔برطانیہ نے غیر قانونی تارکین وطن کے داخلے کو روکنے کے لیے نئی ویزا پالیسی کا اعلان کیا ہے، جس کے تحت مختلف ممالک کے مسافر بھی متاثر ہوں گے۔
نئی پالیسی میں بنیادی طور پر الیکٹرانک ٹریول اتھارٹی (ای ٹی اے) سسٹم کا نفاذ کیا گیا ہے، جس کے تحت ویزا پالیسیوں میں کچھ تبدیلیاں کی گئی ہیں۔
برطانیہ نے ویزا سے مستثنیٰ ممالک کے مسافروں کی آمد سے قبل ان کی پری اسکریننگ کے لیے ای ٹی اے سسٹم متعارف کرایا ہے۔ اس سسٹم کے تحت مسافروں کے پاسپورٹ کے ساتھ ای ٹی اے الیکٹرانک طور پر منسلک کیا جائے گا، جو 2 سال یا پاسپورٹ کی مدت ختم ہونے تک فعال رہے گا۔
نئے سسٹم کے نفاذ کے بعد مختلف ممالک کے مسافروں کو مشکلات کا سامنا ہوگا، کیونکہ ان ممالک کے شہریوں کو اس سے پہلے برطانیہ میں داخل ہونے کے لیے ویزے کی ضرورت نہیں تھی۔
اب امریکا، کینیڈا، آسٹریلیا، جاپان، نیوزی لینڈ، جنوبی کوریا، سنگاپور، اسرائیل، کیریبین، یورپ اور بحرالکاہل کے مختلف ممالک کے شہریوں پر بھی یہ پالیسی لاگو ہوگی، اور برطانیہ جانے سے پہلے انہیں ای ٹی اے کے لیے درخواست دینی ہوگی۔
مسافروں کو ای ٹی اے کے لیے آن لائن یا موبائل ایپ کے ذریعے اپنی پاسپورٹ کی تفصیلات، تازہ ڈیجیٹل تصویر اور 10 پاﺅنڈ فیس کے ساتھ درخواست دینی ہوگی۔
