اسلام آباد ۔بانی چیئرمین پی ٹی آئی عمران خان کے خلاف توہینِ عدالت کی درخواست کی سماعت کے لیے سپریم کورٹ نے تاریخ مقرر کر دی ہے۔
سپریم کورٹ کے 5 رکنی آئینی بینچ کی سربراہی جسٹس امین الدین کریں گے، اور یہ کیس 21 مارچ 2025 کو سماعت کے لیے پیش ہوگا۔
توہینِ عدالت کی یہ درخواست وفاقی حکومت کی جانب سے دائر کی گئی تھی، جو 25 مئی 2022ء کو عمران خان کی قیادت میں لانگ مارچ کے دوران مقررہ مقام کے بجائے ڈی چوک تک پہنچنے پر دائر کی گئی تھی۔
گزشتہ سماعت پر عدالت نے حکومت سے درخواست کی مزید پیروی کرنے یا نہ کرنے کے حوالے سے جواب طلب کیا تھا۔ بانی پی ٹی آئی کی جانب سے سلمان اکرم راجا نے عدالت میں جواب جمع کروا رکھا ہے۔ عدالت نے 2022ء میں لانگ مارچ کے لیے ایک مخصوص گراؤنڈ مختص کرنے کا حکم دیا تھا، اور بانی پی ٹی آئی کے وکلا نے اس بات کی یقین دہانی کرائی تھی کہ لانگ مارچ مقررہ مقام تک ہی پہنچے گا۔
یاد رہے کہ بانی پی ٹی آئی کی قیادت میں 26 مئی 2022ء کو لانگ مارچ جناح ایونیو تک پہنچ کر اختتام پذیر ہوا تھا، اور اس دوران کارکنان نے ڈی چوک کے قریب واقع درختوں کو آگ لگا دی تھی۔
