اسلام آباد: وزیرِ اعظم نے پیٹرولیم مصنوعات کی قیمتوں کو موجودہ سطح پر برقرار رکھنے کا فیصلہ کرتے ہوئے بجلی کے صارفین کو اہم ریلیف دینے کا دعویٰ کیا ہے۔
وزیرِ اعظم نے کہا کہ پیٹرولیم مصنوعات کی قیمتوں کو پچھلی سطح پر برقرار رکھتے ہوئے اس سے حاصل ہونے والا مالی فائدہ بجلی کے نرخوں میں عوام کو منتقل کرنے کا فیصلہ کیا گیا ہے۔
انہوں نے مزید کہا کہ یہ اقدام بجلی کی قیمتوں میں خاطر خواہ کمی لانے والے دیگر کئی اقدامات میں سے ایک ہے۔ بجلی کے نرخوں میں کمی کے حوالے سے ایک جامع حکمت عملی تیار کی جارہی ہے، جس کی تفصیلات جلد ہی حتمی شکل دی جائیں گی۔
وزیرِ اعظم نے وضاحت کی کہ عالمی منڈی میں تیل کی قیمتوں میں تبدیلی سے پیدا ہونے والی مالی گنجائش اور دیگر اقدامات کی بدولت بجلی کی قیمتوں میں عوام کو نمایاں ریلیف فراہم کرنے کے لیے ایک پیکج تیار کیا گیا ہے۔ اس پیکج کا اعلان آئندہ چند ہفتوں میں کیا جائے گا۔
شہباز شریف نے کہا کہ حکومت سنبھالتے ہی عوامی فائدے کو ترجیح دینے کا عزم کیا تھا۔
وزیرِ اعظم ہاؤس کی جانب سے جاری اعلامیے کے مطابق وزیرِ اعظم شہباز شریف نے عوام کو ریلیف دینے کے اپنے عزم کو دوبارہ دہراتے ہوئے کہا کہ اس ریلیف کا اثر نہ صرف بجلی کی قیمتوں پر پڑے گا بلکہ مہنگائی میں بھی کمی آئے گی۔
اعلامیے میں مزید کہا گیا کہ وزیرِ اعظم شہباز شریف جلد ہی اس ریلیف کے حوالے سے قوم کو خطاب کر کے آگاہ کریں گے۔
