ریاض۔کرکٹ کی دنیا میں ٹینس کے گرینڈ سلیم کی طرز پر سعودی عرب کے خفیہ منصوبے کا انکشاف ہوا ہے، جو کہ دنیا کی سب سے مہنگی ٹی20 لیگ بننے کا ارادہ رکھتا ہے۔
آسٹریلیا کی معروف ویب سائٹ “دی ایج” نے اپنی رپورٹ میں بتایا کہ سعودی عرب بین الاقوامی سطح پر ٹی20 لیگ کے قیام پر کام کر رہا ہے، جسے ایک اہم قدم کے طور پر دیکھا جا رہا ہے تاکہ کرکٹ کو مزید فروغ دیا جا سکے۔ رپورٹ کے مطابق، اس منصوبے کو آسٹریلیا کی ایک بااثر کرکٹ شخصیت نے ترتیب دیا ہے۔
رپورٹ میں یہ بھی کہا گیا ہے کہ اس مجوزہ کرکٹ لیگ میں 8 ٹیمیں ہوں گی اور اس کی ساخت ٹینس کے گرینڈ سلیمز کی طرز پر ہوگی۔ لیگ میں حصہ لینے والی ٹیمیں سال بھر میں 4 مختلف مقامات پر میچز کھیلیں گی، اور اسی طرز پر ٹیموں کا انتخاب بھی کیا جائے گا۔
سعودی عرب کے کھیلوں کے محکمہ ایس آر جے اسپورٹس انوسٹمنٹ اس منصوبے کا مرکزی فنانسر ہوگا، اور اس منصوبے پر گزشتہ ایک سال سے انٹرنیشنل کرکٹ کونسل (آئی سی سی) کے ساتھ بات چیت کی جا رہی ہے۔
رپورٹ میں دعویٰ کیا گیا کہ اس منصوبے پر خفیہ طور پر ایک سال سے کام ہو رہا ہے، اور اس منصوبے کے پیچھے آسٹریلیا کے سابق آل راؤنڈر نیل میکسویل کا ہاتھ ہے، جو نہ صرف آسٹریلیشین کرکٹرز ایسوسی ایشن کے سابق بورڈ ممبر ہیں بلکہ آسٹریلوی کپتان پیٹ کمنز کے منیجر بھی ہیں۔
ذرائع نے اس منصوبے کے بارے میں بتایا کہ بین الاقوامی لیگ کے لیے سرمایہ کاروں کا ایک کنسورشیم تیار ہو چکا ہے، تاہم لیگ کا نام ابھی تک ظاہر نہیں کیا گیا۔ سعودی عرب کی جانب سے اس منصوبے کے لیے 500 ملین ڈالر کی خطیر رقم فراہم کی جائے گی۔
