اسلام ٓباد ۔بھارت کی جانب سے سندھ طاس معاہدے کو معطل کرنے کے اقدام پر پاکستان نے سفارتی ذرائع سے باضابطہ نوٹس جاری کرنے کا فیصلہ کیا ہے۔
ذرائع کے مطابق، اس اہم معاملے پر قانونی اور آئینی پہلوؤں پر مشاورت مکمل کر لی گئی ہے، اور اس سلسلے میں وزارت خارجہ، وزارت آبی وسائل اور وزارت قانون نے ابتدائی تیاری مکمل کر لی ہے۔
نوٹس میں بھارت سے معاہدے کی معطلی کی واضح اور مدلل وجوہات طلب کی جائیں گی تاکہ اس کے غیر قانونی اقدام کو چیلنج کیا جا سکے۔
حکومت پاکستان کی جانب سے عالمی سطح پر اس اقدام کے خلاف بھرپور آواز اٹھانے پر بھی غور جاری ہے، تاکہ بھارت کی آبی جارحیت کو بین الاقوامی برادری کے سامنے مؤثر انداز میں پیش کیا جا سکے۔
اس سفارتی پیش رفت کا مقصد پاکستان کے مؤقف کو قانونی، اخلاقی اور بین الاقوامی سطح پر مضبوط بنانا ہے۔
پاکستان کا کہنا ہے کہ اسے سندھ طاس معاہدے پر قانونی برتری حاصل ہے، اور توقع ہے کہ بھارت کو اپنے غیر سنجیدہ فیصلے پر نظرثانی کرنا پڑے گی۔
ذرائع کے مطابق، تمام تر اقدامات حکومت اور کابینہ کی حتمی منظوری کے بعد کیے جائیں گے۔
