ماہرین نے عالمی سطح پر خبردار کیا ہے کہ دنیا بھر کے شہروں میں چوہوں کی تعداد کہیں زیادہ بڑھ گئی ہے اور مسلسل بڑھ رہی ہے۔
ایک کہاوت ہے کہ بڑے شہر میں کسی بھی شخص سے چھ فٹ کی دوری پر چوہا ضرور موجود ہو گا چاہے زیر زمین یا کہیں چھپا ہوا۔اب سائنسدانوں نے اس کہاوت کی تصدیق کرتے ہوئے خبردار کیا ہے کہ دنیا بھر کے شہروں میں چوہوں کی تعداد میں مسلسل اضافہ ہو رہا ہے۔
اس بارے میں سائنسدانوں کا کہنا ہے کہ دنیا کے کئی شہروں میں ان کی آبادی خطرناک حد تک بڑھ رہی ہے اور یہ بنیادی طور پر ایک وجہ سے ہے: وہ موسمیاتی تبدیلی ہے۔
اس تحقیق کیلئے اکٹھا کیا گیا ڈیٹا اوسطا 12 سال پر محیط ہے اور اس میں چوہے کو دیکھنے کے واقعات، انہیں پکڑنے اور اس حوالے سے کیے گئے معائنے کی رپورٹس بھی شامل ہیں۔
سائنس ایڈوانسز نامی جریدے میں شائع ہونے والی تحقیق کے مطابق دنیا کے کئی شہروں میں ان کی آبادی میں نمایاں اضافے کے رجحانات پائے گئے ہیں، تاہم صرف تین شہروں میں ان کی آبادی میں کمی دیکھی گئی ہے جو کہ نیو اورلینز، لوئس ول اور ٹوکیو ہیں۔
اس تحقیق میں چوہے کے بڑھنے کو کئی عوامل سے منسلک کیا گیا، جن میں انسانوں کی زیادہ آبادی کی کثافت اور پیڑ پودوں کی کم مقدار شامل ہے لیکن اس کی سب سے بڑی وجہ عالمی سطح پر زیادہ درجہ حرارت ہے ۔
