اسلام آباد ۔پاک سوزوکی نے اپنی ہیچ بیک گاڑی ویگن آر کی نئی بکنگ کو مستقل طور پر معطل کرنے کا فیصلہ کیا ہے، جس کی وجہ سے پاکستانی مارکیٹ میں اس گاڑی کی دستیابی ختم ہوگئی ہے۔ حالیہ مہینوں میں کمپنی نے ویگن آر کے ٹاپ ویرینٹ کی بکنگ بند کر دی تھی، جس کے بعد یہ افواہیں سامنے آئی تھیں کہ دیگر ویرینٹس کی بکنگ بھی معطل کی جا سکتی ہے۔
پاک سوزوکی کی جانب سے ڈیلرز کو بھیجے گئے ایک نوٹیفکیشن میں یہ اعلان کیا گیا ہے کہ ویگن آر کی بکنگ کی معطلی 11 مارچ 2025 سے نافذ ہوگی۔ کمپنی نے ڈیلرز کو اپنی سیلز ٹیموں اور ممکنہ خریداروں کو اس فیصلے سے آگاہ کرنے کی ہدایت کی ہے۔
یہ بھی پڑھیں: سوزوکی آٹو اور راوی گاڑیوں کی قیمتوں میں اضافہ، نئی قیمتیں کیا ہوں گی؟
پاکستان میں 2014 میں متعارف کرائی گئی ویگن آر نے ایندھن کی بچت اور عمدہ کارکردگی کے باعث بے پناہ مقبولیت حاصل کی۔ ابتدائی طور پر اسے تین ویرینٹس میں متعارف کرایا گیا تھا، جن کی قیمتیں کچھ اس طرح تھیں:
وی ایکس: 8 لاکھ 99 ہزار روپے
وی ایکس آر: 10 لاکھ 49 ہزار روپے
وی ایکس ایل: 10 لاکھ 89 ہزار روپے
یہ گاڑی 2016-17 کے دوران پاکستان میں اوبر اور کریم کی سروسز کے دوران خاصی مقبول ہوئی، کیونکہ اس کی اندرونی جگہ اور ایندھن کی بچت نے ڈرائیورز کی توجہ حاصل کی۔
بعد ازاں وی ایکس ویرینٹ کو بند کردیا گیا اور 2020 میں ایک نیا ٹاپ آف دی لائن AGS (آٹومیٹڈ گیئر شفٹ ٹرانسمیشن) ویرینٹ متعارف کروایا گیا، جس میں ایئر بیگ جیسے فیچرز شامل کیے گئے، اور اس کی قیمت 18 لاکھ 90 ہزار روپے رکھی گئی۔
یہ بھی پڑھیں: سوزوکی نے اپنا پہلا الیکٹرک اسکوٹر متعارف کرادیا، اس میں کیا خاص فیچرز ہیں؟
ویگن آر کی بکنگ روکنے کے فیصلے نے نئے ماڈل کے بارے میں قیاس آرائیاں شروع کر دی ہیں۔ تاہم پاک سوزوکی کے ایک نمائندے نے واضح کیا کہ فی الحال متبادل کے لیے کوئی فوری منصوبہ نہیں ہے، تاہم اگلے 2 سے 3 سال میں نیا ماڈل متعارف ہو سکتا ہے۔
